".உலக தந்தையர் தினம் " ( ஜூன் 21-ம் தேதி )

தந்தை சொல்மிக்க மந்திரம் இல்லை!

 

வயிறோடு விளையாடும் கருவுடன், 

மனதோடு உறவாடி மகிழ்வாள் அன்னை. 

தொப்புள்கொடி பந்தம் பிரிக்க முடியாது தான்.

ஆனால் ? 

தந்தையின் பாசம் வாழ்வோடு கலந்தது.

மனைவியின் வயிற்றில் காதை வைத்து,  நிறமறியா, முகமறியா பிள்ளையுடன், காதோடு பேசி மகிழும் தந்தையின் பாசம்... தரணியெல்லாம் பேசும்.

மழலையின் சிரிப்பில் மனதை தொலைத்து,

வாழ்க்கையை பிள்ளைக்காக அர்ப்பணிக்கும் நேசம்.

எவ்வளவு பெரிய உயரத்தில் இருந்தாலும்,  தலைகுனிந்து, உடல்குனிந்து பிள்ளையை முதுகில் உப்புமூட்டையாக ஏற்றியும்,  தலைக்கு மேல் தூக்கியும் கூத்தாடும் பரவசம்.

தந்தையன்றி வேறு யாருக்கு வரும்? 

"விடு... விடு...' என்று வாழ்க்கை முழுதும் விட்டுக் கொடுக்கும் அந்த பெரிய உள்ளம், இறைவன் நமக்களித்த இயற்கை வெள்ளம்.

ஓய்வறியா கால்கள் ஊன்றுகோலைத் தேட... நரை தோன்றி முகச்சுருக்கம் முற்றுகையிட... பிள்ளையின் அன்பே தஞ்சமென தேடும் அப்பாவி(ன்) நெஞ்சம்... ஆயிரம் தெய்வங்களை மிஞ்சும்.

இன்று தந்தையர் தினம். 

வளர்ந்தாலும் அப்பாவுக்கு நாம் பிள்ளைகள் தான். மழலையில் கைப்பிடித்து,  வாழ்வின் பாதைக்கு நம்மை அழைத்துச் சென்ற அப்பாவின் தியாகத்தை நினைவு கூர்வோம். முதுமையில் அள்ளி அணைத்து ஆறுதல் செய்வோம்.

அன்புக்கு எப்படி அன்னையோ,  அதுபோல குழந்தையின் அறிவுக்கு தந்தையே முன்னோடியாக திகழ்கிறார்.

பெரும்பாலான வீடுகளில் குடும்ப நிர்வாகம் தந்தையின் கைகளிலேயே இருக்கிறது. குடும்பத்தில் தந்தையின் உழைப்பே அதிகமாக இருக்கும். வாழ்நாளில் கடைசிவரை, குழந்தைகளுக்காக உழைக்கும் தந்தையருக்கு நன்றி செலுத்தும் விதமாக தந்தையர் தினம் ஜூன் 3வது ஞாயிற்றுக்கிழமை கொண்டாடப்படுகிறது.

இத்தினம் மேலைநாட்டிலிருந்து வந்திருந்தாலும், இந்தியாவிலும் இத்தினம் பரவலாக ஏற்றுக்கொள்ளப்பட்டு இருக்கிறது.

பிரான்ஸ் நாட்டில் இந்த தினம் இன்று ஜூன்21 ந்தேதி (ஞாயிற்றுக்கிழமை) கொண்டாடப் படுகிறது.

ஒவ்வொருவரும் தந்தைக்கு,  நேரிலோ,  போனிலோ,  பரிசுப் பொருள் அல்லது பூங்கொத்து கொடுத்து வாழ்த்து தெரிவித்து,  இத்தினத்தை கொண்டாடி மகிழ்கின்றனர்.

சிறு வயதிலேயே குழந்தைகளுக்கு,  தந்தையை மதிக்க கற்றுத் தருவதே இதன் நோக்கம். 

தந்தையும் குழந்தைகளுக்கென நேரம் ஒதுக்கி, அவர்களுக்கு நல்லொழுக்கங்களை கற்றுத் தர வேண்டும்.

எப்படி வந்தது ?

அமெரிக்காவில் 1909ல், சொனாரா லூயிஸ் ஸ்மார்ட் டாட் என்ற இளம் பெண், தந்தையர் தினம் கொண்டாடும் யோசனையை முன் வைத்தார். அன்னையர் தினம் கொண்டாடும் போது,  தந்தையர் தினம் ஏன் கொண்டாடக் கூடாது என வலியுறுத்தினார். இவர்,  தனது தாயாரின் மறைவுக்கு பிறகு ஆறு குழந்தைகள் கொண்ட குடும்பத்தை,  கடுமையான சிரமங்களுக்கிடையே தந்தை வில்லியம் பராமரிப்பதை கண்டார். இது தான் தந்தையர் தினம் கொண்டாட வேண்டும் என்ற எண்ணத்தை இவருக்கு தூண்டியது. இதன்படி 1910ம் ஆண்டு முதன்முதலில் தந்தையர் தினம் கொண்டாடப்பட்டது. 1972ல் அமெரிக்க ஜனாதிபதி ரிச்சர்ட் நிக்சன், அந்நாட்டின் அங்கீகரிக்கப்பட்ட விடுமுறை தினமாக இந்நாளை அறிவித்தார்.

 இதயத்தையே நெகிழ வைக்கும் க்யூட் வீடியோ:

உங்கள் அப்பா, தன்னை அப்பாவாக உணர்ந்த முதல் நொடியை உங்களால் கற்பனை செய்து பார்க்க முடிகிறதா?

 உங்கள் அம்மா ”நீங்க அப்பாவாகப் போறீங்க.”  என்று சொன்ன நொடியில் உங்கள் அப்பாவின் கொண்டாட்ட ரியாக்‌ஷன் என்னவாக இருந்திருக்கும்?

ஏன்.. திடீர்னு இந்த யோசனை கேக்குறீங்களா? 

எல்லாம் இந்த வீடியோவப் பார்த்தப் பிறகே புரியும்!

நல்லொழுக்கங்களை கற்றுத் தர வேண்டும்!

இன்று! 21-ம் தேதி உலக தந்தையர் தினம் கொண்டாடப் படுவதை முன்னிட்டு, ஒரு ஆண் முதன் முதலாக தன்னை அப்பாவாக உணரும் அந்த அபூர்வ நொடியை, கேமராவுக்குள் சிறைப்படுத்தி, ஒரு நிமிடத்தில் இதயத்தையே நெகிழ வைக்கும் க்யூட் வீடியோவாகக் கொடுத்துள்ளது ஒரு தனியார் நிறுவனம்.

யூ-டியுபில் பதிவேற்றப்பட்ட இந்த கிரேட் வீடியோவை இதுவரை 14 லட்சம் பேர் பார்த்து செம ஃபீலிங்ஸாகியிருக்கிறார்கள்.

உங்களுக்காக அந்த க்யூட், கிரேட் வீடியோ:-

https://youtu.be/R0-5HORRXU0

தகவல் பகிர்வு; 

புதுவை வேலு 

நன்றி: தினமலர்/மாலைமலர்/You Tube